ಅಂತೂ ಇಂತೂ ಮುಂಡರಗಿ ಬಿಜೆಪಿ ಮಂಡಲಕ್ಕೆ ನಾಯಕತ್ವ: ಹಾವಿನಾಳರ ನಿರ್ಗಮನದ ನಂತರ ಖಾಲಿ ಇದ್ದ ಸ್ಥಾನ: ಎಂಟು ತಿಂಗಳ ಬಳಿಕ ಕುಮಾರಸ್ವಾಮಿ ಹಿರೇಮಠರಿಗೆ ಹೊಣೆ: ಆಕಾಂಕ್ಷಿಗಳ ಪೈಪೋಟಿಗೆ ತೆರೆ – ಯುವ ನಾಯಕನಿಗೆ ಹೊಣೆಗಾರಿಕೆ..

ಗದಗ: ಬಹುಕಾಲದಿಂದ ಖಾಲಿಯಾಗಿದ್ದ ಮುಂಡರಗಿ ಬಿಜೆಪಿ ಮಂಡಲ ಅಧ್ಯಕ್ಷ ಸ್ಥಾನಕ್ಕೆ ಅಂತೂ ಇಂತೂ ತೆರೆ ಬಿದ್ದಿದ್ದು, ಯುವ ಮುಖಂಡ ಡಾ. ಕುಮಾರಸ್ವಾಮಿ ಹಿರೇಮಠ ಅವರನ್ನು ನೂತನ ಅಧ್ಯಕ್ಷರಾಗಿ ಆಯ್ಕೆ ಮಾಡಲಾಗಿದೆ. ಕಳೆದ ಎಂಟು ತಿಂಗಳಿಂದ ನಾಯಕತ್ವವಿಲ್ಲದೆ ನಾವಿಕನಿಲ್ಲದ ದೋಣಿಯಂತಾಗಿದ್ದ ಮಂಡಲಕ್ಕೆ ಇದೀಗ ಹೊಸ ದಿಕ್ಕು ದೊರೆತಂತಾಗಿದೆ.

ವರದಿ: ಮಹಲಿಂಗೇಶ ಹಿರೇಮಠ. ಗದಗ

ಶಿರಹಟ್ಟಿ ವಿಧಾನಸಭಾ ಕ್ಷೇತ್ರದ ವ್ಯಾಪ್ತಿಯಲ್ಲಿರುವ ಮುಂಡರಗಿ ಮಂಡಲದಲ್ಲಿ ಕಳೆದ ವರ್ಷ ಆಗಸ್ಟ್ 23ರಂದು ಆಗಿನ ಅಧ್ಯಕ್ಷ ಹೇಮಗಿರಿಶ ಹಾವಿನಾಳ ಅವರು ದಿಢೀರ್ ರಾಜೀನಾಮೆ ಸಲ್ಲಿಸಿದ ಬಳಿಕ, ಪಕ್ಷದ ಸಂಘಟನೆ ಕೆಲ ಮಟ್ಟಿಗೆ ಶಿಥಿಲಗೊಂಡಿತ್ತು. ಆಂತರಿಕ ಅಸಮಾಧಾನ ಹಾಗೂ ಪಕ್ಷದ ಒಳಗಣ್ಣಿನ ರಾಜಕೀಯವೇ ಅವರ ರಾಜೀನಾಮೆಗೆ ಕಾರಣ ಎನ್ನುವ ಮಾತುಗಳು ಆ ಸಮಯದಲ್ಲಿ ಕೇಳಿಬಂದಿದ್ದವು. ಆದರೆ ಅಧಿಕೃತವಾಗಿ ಯಾವುದೇ ಸ್ಪಷ್ಟನೆ ಹೊರಬಾರದ ಕಾರಣ, ಈ ವಿಷಯ ಪಕ್ಷದೊಳಗೆ ಚರ್ಚೆಯಾಗಿ ಉಳಿದಿತ್ತು.

ಅದಾದ ಬಳಿಕ, ಹೊಸ ಅಧ್ಯಕ್ಷರ ಆಯ್ಕೆ ವಿಚಾರದಲ್ಲಿ ಹಲವು ಆಕಾಂಕ್ಷಿಗಳು ತಮ್ಮ ತಮ್ಮ ಪ್ರಭಾವ ಬಳಸಿ ಪೈಪೋಟಿ ನಡೆಸಿದರೂ, ನಿರ್ಧಾರ ಮುಂದೂಡಿಕೆಯಾಗುತ್ತಲೇ ಇತ್ತು. ಇದರಿಂದ ಕಾರ್ಯಕರ್ತರಲ್ಲಿ ಗೊಂದಲ ಹಾಗೂ ಅಸಮಾಧಾನವೂ ಮೂಡಿತ್ತು. ಮಂಡಲ ಮಟ್ಟದಲ್ಲಿ ನಾಯಕತ್ವದ ಕೊರತೆಯಿಂದ ಪಕ್ಷದ ಚಟುವಟಿಕೆಗಳು ಕುಂಠಿತಗೊಂಡಿದ್ದವು ಎಂಬ ಟೀಕೆಗಳೂ ಕೇಳಿಬಂದಿದ್ದವು.

ಇದೀಗ ಶಿರಹಟ್ಟಿ ಶಾಸಕ ಡಾ. ಚಂದ್ರು ಲಮಾಣಿ ಅವರ ಮಾರ್ಗದರ್ಶನದಲ್ಲಿ ಹಾಗೂ ಪಕ್ಷದ ಹಿರಿಯ ಮುಖಂಡರ ಸಲಹೆ ಸೂಚನೆಗಳ ಮೇರೆಗೆ ಡಾ. ಕುಮಾರಸ್ವಾಮಿ ಹಿರೇಮಠ ಅವರನ್ನು ಮಂಡಲ ಅಧ್ಯಕ್ಷರಾಗಿ ಆಯ್ಕೆ ಮಾಡಲಾಗಿದೆ. ಈ ಮೂಲಕ ದೀರ್ಘಕಾಲದ ಗೊಂದಲಕ್ಕೆ ತೆರೆ ಬಿದ್ದಂತಾಗಿದೆ.

ಬಿಜೆಪಿ ಜಿಲ್ಲಾ ಘಟಕದ ಅಧ್ಯಕ್ಷ ರಾಜು ಕುರಡಗಿ ಅವರು ಕುಮಾರಸ್ವಾಮಿ ಅವರಿಗೆ ನೇಮಕಾತಿ ಆದೇಶ ಪತ್ರ ನೀಡಿ, ಮಂಡಲದ ಎಲ್ಲ ಕಾರ್ಯಕರ್ತರನ್ನು ವಿಶ್ವಾಸಕ್ಕೆ ಪಡೆದು ಸಂಘಟನೆ ಬಲಪಡಿಸುವಂತೆ ಸೂಚಿಸಿದ್ದಾರೆ. ಪಕ್ಷದ ತತ್ವಗಳನ್ನು ಗ್ರಾಮ ಮಟ್ಟಕ್ಕೆ ತಲುಪಿಸುವುದು ಹಾಗೂ ಮುಂದಿನ ಚುನಾವಣೆಗಳ ದೃಷ್ಟಿಯಿಂದ ಸಂಘಟನೆಗೆ ಚೈತನ್ಯ ತುಂಬುವುದು ಹೊಸ ಅಧ್ಯಕ್ಷರ ಮುಂದೆ ಇರುವ ಪ್ರಮುಖ ಸವಾಲಾಗಿದೆ.

ಯುವ ಮುಖಂಡನಾಗಿ ಗುರುತಿಸಿಕೊಂಡಿರುವ ಡಾ. ಕುಮಾರಸ್ವಾಮಿ ಹಿರೇಮಠ ಅವರ ಆಯ್ಕೆಯನ್ನು ಪಕ್ಷದ ಒಂದು ವಲಯ ಸ್ವಾಗತಿಸಿದರೂ, ಮತ್ತೊಂದು ವಲಯದಲ್ಲಿ ಮೌನ ಅಸಮಾಧಾನವಿರುವುದೂ ನಿಜ. ಅಧ್ಯಕ್ಷ ಸ್ಥಾನಕ್ಕಾಗಿ ಪೈಪೋಟಿ ನಡೆಸಿದ ಕೆಲ ಆಕಾಂಕ್ಷಿಗಳಿಗೆ ಅವಕಾಶ ಸಿಗದ ಹಿನ್ನೆಲೆ, ಆಂತರಿಕ ಏಕತೆ ಕಾಪಾಡಿಕೊಳ್ಳುವುದು ಹೊಸ ಅಧ್ಯಕ್ಷರ ಮೊದಲ ಪರೀಕ್ಷೆಯಾಗಲಿದೆ.

ಇದೇ ವೇಳೆ, ಮಂಡಲದಲ್ಲಿ ಕಳೆದ ಎಂಟು ತಿಂಗಳಿನಿಂದ ಉಂಟಾಗಿದ್ದ ನಾಯಕತ್ವದ ಶೂನ್ಯತೆಯಿಂದ ಪಕ್ಷದ ನೆಲೆಬದ್ಧತೆ ಕುಂದಿದೆ ಎಂಬ ಅಭಿಪ್ರಾಯಗಳೂ ಕೇಳಿಬರುತ್ತಿವೆ. ಈ ಹಿನ್ನಲೆಯಲ್ಲಿ, ಹಿರೇಮಠ ಅವರು ಸಂಘಟನಾ ಶಕ್ತಿಯನ್ನು ಪುನಃ ನಿರ್ಮಿಸಿ, ಕಾರ್ಯಕರ್ತರಲ್ಲಿ ಹೊಸ ಉತ್ಸಾಹ ತುಂಬಬೇಕಾದ ಜವಾಬ್ದಾರಿ ಎದುರಾಗಿದೆ.

ಒಟ್ಟಿನಲ್ಲಿ, ಬಹು ನಿರೀಕ್ಷೆಗಳ ನಡುವೆ ಅಧ್ಯಕ್ಷ ಸ್ಥಾನಕ್ಕೇರಿರುವ ಡಾ. ಕುಮಾರಸ್ವಾಮಿ ಹಿರೇಮಠ ಅವರು ಪಕ್ಷದ ಒಳಗಿನ ಭಿನ್ನಾಭಿಪ್ರಾಯಗಳನ್ನು ಸಮನ್ವಯಗೊಳಿಸಿ, ಸಂಘಟನೆಯನ್ನು ಗಟ್ಟಿಗೊಳಿಸುವಲ್ಲಿ ಯಶಸ್ವಿಯಾಗುವರೇ ಎಂಬುದು ಮುಂದಿನ ದಿನಗಳಲ್ಲಿ ತಿಳಿಯಲಿದೆ. ಅವರ ನಾಯಕತ್ವದಲ್ಲಿ ಮುಂಡರಗಿ ಮಂಡಲಕ್ಕೆ ಹೊಸ ಚೈತನ್ಯ ಸಿಗುತ್ತದೆಯೇ ಎಂಬುದರ ಮೇಲೆ ಎಲ್ಲರ ಕಣ್ಣಿದೆ.